Binay at Cayetano, nagkasagutan sa pagdinig ukol sa bagong Senate building

Nagsabong sina Sen. Alan Peter Cayetano at Sen. Nancy Binay sa pagdinig ng Senate Committee on Accounts kaugnay sa ipinapatayong bagong gusali ng Senado. Napa-walk out pa si Binay sa pagdinig.

Hindi na napigilan ng dalawang senador na ilabas ang init ng ulo sa isa’t isa kaugnay sa isyu ng halaga ng konstruksyon ng gusali ng Taguig City.

Tinanong ni Binay kung bakit pinipilit na P23 bilyon ang presyo ng gusali samantalang nasa P21.7 bilyon ang total amount base sa datos ng Department of Public Works and Highways #DPWH.

Pero giit ni Cayetano, nakuha nila ang datos mula sa Senate coordinating team ng dating staff ni Binay sa Senate Committee on Accounts.

Ayon naman kay Binay, lumolobo ang presyo dahil sinasama ni Cayetano ang presyo ng lote.
Binanatan din ni Cayetano ang mga sinabi ni Binay na kaya inuungkat ang presyo ng Senate building dahil sa pulitika, partikular sa matagal nang issue ng Taguig City at Makati City.

Sinabi rin ni Binay na may isang senador na nag-iikot para siraan siya at sinasaksak siya sa likod. Hindi na niya ito pinangalanan.

Sinisingil din ni Cayetano si Binay sa bagal umano niyang magtrabaho, partikular sa P600 milyon na plano para sa landscape ng gusali. Depensa ni Binay, inaaral niya kasi ito nang mabuti.

Itutuloy ang pagdinig sa mga susunod na linggo. #News5 via Maeanne Los Baños

Follow News5 and stay updated with the latest stories!

https://www.facebook.com/News5Everywhere
https://twitter.com/News5PH
https://www.instagram.com/news5everywhere/
https://www.tiktok.com/@news5everywhere
https://www.news5.com.ph